ಕಾಡುವ ಭಾವಗಳಿಗೆ ಹಾಡಲೊಂದಿಷ್ಟು ಜಾಗ...

ಬುಧವಾರ, ಏಪ್ರಿಲ್ 17, 2013

ಕರೆಂಟು ಹೊಡೆಸಿಕೊಂಡ ಡಿಎನ್ಯೆಯೂ, ವಿಮಾನ ಹತ್ತಿದ ಕಾರ್ಟೂನೂ..

ಎಂದಿನಂತೆ ಬೆಳ್ಳಂಬೆಳಗ್ಗೆ ಎದ್ದು ನನ್ನ ಲ್ಯಾಬೋರೇಟರಿಗೆ ಬಂದು, ನಿನ್ನೆಯಷ್ಟೇ ಅಗಸೀ ಗಿಡದ ಎಲೆಯನ್ನೆಲ್ಲ ಹಿಂಡಿ ಹಿಪ್ಪೆ ಮಾಡಿ ತೆಗೆದಿದ್ದ ಕಣ್ಣಿಗೂ ಕಾಣದ ಡಿಎನ್ಎಯನ್ನು , ಪುಟ್ಟ ಇಲೆಕ್ಟ್ರಾನಿಕ್ ಟ್ಯಾಂಕಿಯಲ್ಲಿ ಈಗಾಗಲೇ ಮಾಡಿಟ್ಟಿದ್ದ ಯಾವುದೋ ಸಮುದ್ರ ಕಳೆಯಿಂದ ತೆಗೆದ ಜೆಲ್ಲಿಯೊಳಕ್ಕೆ ತೂರಿಸಿ, ಸರಿಯಾಗಿ ಎಂಬತ್ತು ವೋಲ್ಟ್ ಕರೆಂಟು ಕೊಟ್ಟು, ಡಿಎನ್ಯೆಯನ್ನು ಟ್ಯಾಂಕಿಯ ಒಂದು ಧ್ರುವದಿಂದ ಮತ್ತೊಂದಕ್ಕೆ ಓಡಿಸುತ್ತಿದ್ದೆ. ಹೀಗೆ ಕರೆಂಟು ಹೊಡೆಸಿಕೊಂಡ ಡಿಎನ್ಯೆ ಒಂದು ಕಡೆಯಿಂದ ಮತ್ತೊಂದು ಕಡೆಗೆ ತನ್ನ ಗಾತ್ರಕ್ಕನುಗುಣವಾಗಿ ಜೆಲ್ಲಿಯೊಳಕ್ಕೆ ಓಡುತ್ತಿತ್ತು. ತೆಳ್ಳಗಿನ ಪುಟ್ಟ ಡಿಎನ್ಯೆ ಜೆಲ್ಲಿಯೊಳಗಣ ತೂತಿನೊಳಗೆ ತೂರಿಕೊಂಡು ಸಲೀಸಾಗಿ ಓಡಬಲ್ಲುದು. ದಪ್ಪದ್ದು-ದೊಡ್ಡದ್ದಕ್ಕೆ ಅಡೆತಡೆಗಳನ್ನೆಲ್ಲ ದಾಟಿ ಓಡುವುದು ಕಷ್ಟ; ಹೀಗಾಗಿ ಅವು ನಿಧಾನಕ್ಕೆ ಸಾಗುತ್ತವೆ (ಮನುಷ್ಯರಲ್ಲೂ ಅಷ್ಟೇ ತಾನೇ!)

ಹೀಗೆ ಅವು ಒಮ್ಮೆ ಓಡತೊಡಗಿದರೆ ತುದಿ ಮುಟ್ಟಲು ಮತ್ತೆರೆಡು ಗಂಟೆ ಕಾಯಬೇಕು. ಹೀಗಾಗಿ ಮಾಡಲು ಬೇರೇನೂ ಕೆಲಸವಿರಲಿಲ. ಬೇರೆ ದಿನವಾಗಿದ್ದರೆ ಈ ಸಮಯದಲ್ಲಿ ಯಾವ್ಯಾವುದೋ ತಲೆತಿನ್ನುವ- ತಲೆಕೆಳಗಾಗಿ ಓದಿದರೂ ಸುಲಭಕ್ಕೆ ಅರ್ಥವಾಗದ ವೈಜ್ನಾನಿಕ ಲೇಖನಗಳನ್ನು ಓದಿ ಅರಿಯಲು ತಿಣುಕುತ್ತಿದ್ದೆ. ಅದೂ ಬೇಸರ ಮೂಡಿಸಿದರೆ ಮೂರ್ತೀರಾಯರ ಪ್ರಬಂಧವನ್ನೋ, ವಸುಧೇಂದ್ರರ ಕಥೆಯನ್ನೋ, ಇಲ್ಲಾ ಕುವೆಂಪುರವರ ಕಾದಂಬರಿಯನ್ನೋ ಹಿಡಿದು ಡಿಎನ್ಯೆ ಜಗತ್ತಿನಿಂದ ದೂರಾಗಿ ಕಲ್ಪನಾ ಲೋಕದಲ್ಲಿ ವಿಹರಿಸುತ್ತಿದ್ದೆ. ಆದರಿವತ್ತು ಹಾಗೆ ಮಾಡುವಂತಿರಲಿಲ್ಲ…
ಬೆಳಿಗ್ಗೆ ನಾನು ‘ಕರಾಗ್ರೇ ವಸತೇ ಲಕ್ಷ್ಮೀ’ ಹೇಳುವ ಮೊದಲೇ ಫೋನ್ ಮಾಡಿದ್ದ ನನ್ನ ಸಂಶೋಧನೆಯ ಗೈಡ್ ಇವತ್ತು ಯಾವುದೋ ಯೂರೋಪಿಯನ್ ಯೂನಿವರ್ಸಿಟಿಯ ಘನಂದಾರಿ ವಿಜ್ನಾನಿಗಳೂ, ಅಧಿಕಾರಿಗಳೂ ಬರುತ್ತಿದ್ದಾರೆಂದೂ, ತನಗೆ ಬೇರೆ ಅಗತ್ಯ ಕೆಲಸಗಳಿರುವುದರಿಂದ ಅವರನ್ನು ಅಟೆಂಡ್ ಮಾಡಲಾಗುವುದಿಲ್ಲವೆಂದೂ ಹೇಳಿ, ನೀನೇ ಹೇಗಾದರೂ ನಿಭಾಯಿಸು ಅನ್ನುತ್ತಾ ಎಂದಿನಂತೆ ಜಾರಿಕೊಂಡರು. ಅವರು ಲ್ಯಾಬಿಗೆ ಬಂದಾಗ ಏನಾದರೂ ಕೆಲಸ ಮಾಡುತ್ತಿರು, ಸುಮ್ಮನೆ ಏನೇನೋ ಓದುತ್ತಾ ಕೂರಬೇಡ ಎಂದರು!

ಹೀಗೆ ಯಾರ್ಯಾರೋ ನನ್ನ ಲ್ಯಾಬಿಗೆ ಭೇಟಿಯಿಡುವುದು ಹೊಸತಲ್ಲದ್ದರಿಂದ ಅದೊಂದು ದೊಡ್ಡ ವಿಷಯವಾಗಿರಲಿಲ್ಲ. ಆದರೆ ನಾನು ಕದ್ದು-ಮುಚ್ಚಿ ‘ಏನೇನೋ ಓದುವ’ ಸಂಗತಿ ನನ್ನ ಗೈಡ್ಗೆ ಗೊತ್ತಾಗಿದ್ದಾದರೂ ಹೇಗೆ? ಇನ್ನೊಮ್ಮೆ ಸಿಕ್ಕಿಹಾಕಿಕೊಂಡರೆ ಅವರಿಂದ ಮಹಾಮಂಗಳಾರತಿ ಗ್ಯಾರಂಟಿ ಎಂದುಕೊಳ್ಳುತ್ತಾ ಹಾಸ್ಟೆಲ್ಲಿನಲ್ಲಿ ತಿಂಡಿಯನ್ನೂ ತಿನ್ನದೇ ಲ್ಯಾಬೋರೇಟರಿಗೆ ಓಡಿಬಂದಿದ್ದೆ. ಅಲ್ಲಿದ್ದ ಕಥೆ-ಕಾದಂಬರಿಗಳನ್ನೆಲ್ಲಾ ಅಡಿಗೆ ತೂರಿಸಿ, ದಪ್ಪ-ದಪ್ಪ ವೈಜ್ನಾನಿಕ ಪುಸ್ತಕಗಳನ್ನೂ, ಸಂಶೋಧನಾ ಪ್ರಬಂಧಗಳನ್ನೂ ಎಲ್ಲರಿಗೆ ಕಾಣುವಂತೆ ಇಟ್ಟು, ನನ್ನ ಲ್ಯಾಪ್ಟಾಪಿನ ವಾಲ್ ಪೇಪರಾಗಿ ಮಿಂಚುತ್ತಿದ್ದ ಸಿನೆಮಾ ತಾರೆಯನ್ನು ವಾಪಸ್ಸು ಕಳುಹಿಸಿ, ಅವಳ ಬದಲಿಗೆ ನಮ್ಮೊಳಗಿನ ಡಿಎನ್ಯೆಯ ಗ್ರಾಫಿಕ್ ಚಿತ್ರವೊಂದನ್ನು ಹಾಕಿಟ್ಟು, ಪಿಪೆಟ್ಟು-ಟೆಸ್ಟ್ ಟ್ಯೂಬು ಹಿಡಿದು ಏನೋ ಭಯಂಕರ ರೀಸರ್ಚು ಮಾಡುವವನಂತೆ ಫೋಸುಕೊಡುತ್ತಾ ಅವರಿಗಾಗಿ ಕಾಯುತ್ತಿದ್ದೆ..

ಸರಿಯಾಗಿ ಒಂಭತ್ತೂವರೆಗೆ ನನ್ನ ಡಿಪಾರ್ಟ್ ಮೆಂಟಿನ ಹೆಡ್ಡು ನಾಲ್ಕೈದು ಬಿಳಿಚರ್ಮದವರನ್ನು ಕರೆದುಕೊಂಡು ಲ್ಯಾಬಿಗೆ ಬಂದರು. ಆರಡಿ ಮೀರಿದ ಧಡೂತಿ ದೇಹದ, ನೀಟಾಗಿ ಶೇವ್ ಮಾಡಿ ಇನ್ ಶರ್ಟ್ ಮಾಡಿದವ ಅಧಿಕಾರಿಯಿರಬೇಕೆಂದೂ, ಅಷ್ಟೇ ಎತ್ತರದ, ಲವಲವಿಕೆಯಿಲ್ಲದ ದೇಹದ, ಗಡ್ಡಬಿಟ್ಟು ದಪ್ಪ ಕನ್ನಡಕ ಹಾಕಿ, ತಲೆಬಾಚಲು ಮರೆತಂತಿದ್ದವ ವಿಜ್ನಾನಿಯಿರಬೇಕೆಂದೂ ಊಹಿಸಿದೆ. ಜೊತೆಗಿಬ್ಬರು ಮೂವತ್ತೈದು ದಾಟದ ಮಹಿಳೆಯರೂ ಇದ್ದರು. ನಾನು ಎಂದಿನಂತೆ ನನ್ನ ಲ್ಯಾಬೋರೇಟರಿ ಇದುವರೆಗೆ ಮಾಡಿರುವ ಸಾಧನೆಯನ್ನೂ, ನಾನೀಗ ಮಾಡುತ್ತಿರುವ ಅಗಸೀ ಗಿಡದ ಬಗೆಗಿನ ಸಂಶೋಧನೆಯನ್ನೂ, ಅದರ ಪ್ರಾಮುಖ್ಯತೆಯನ್ನೂ ಪವರ್ ಪಾಯಿಂಟ್ ಬಳಸಿ ಪುಟ್ಟದೊಂದು ಉಪನ್ಯಾಸ ಕೊಟ್ಟೆ. ಡಿಎನ್ಯೆ ಫಿಂಗರ್ ಪ್ರಿಂಟಿಂಗ್ ಹೇಗೆಲ್ಲಾ ಮಾಡುತ್ತೇವೆಂದೂ, ಕುಲಾಂತರಿಗಳನ್ನು ಹೇಗೆ ಗುರುತಿಸಬಹುದೆಂದೂ ಅಲ್ಲಿದ್ದ ಉಪಕರಣ ತೋರಿಸಿ ವಿವರಿಸಿದೆ. ಎಲ್ಲರೂ ಆಸಕ್ತಿಯಿಂದ ಕೇಳಿ ನೋಟ್ಸ್ ಮಾಡಿಕೊಂಡರು, ಪ್ರಶ್ನೆ ಕೇಳಿದರು. ಗೊತ್ತಿದ್ದಷ್ಟನ್ನು ಉತ್ತರಿಸಿದೆ.

ಆದರೆ ಅವರೊಡನಿದ್ದ ಅಧಿಕಾರಿ ಮಾತ್ರ ಏನೋ ಚಡಪಡಿಕೆಯಲ್ಲಿದ್ದಾನೆಂದು ತೋರುತ್ತಿತ್ತು ಅತ್ತಿತ್ತ ನೋಡುತ್ತ ಕಂಗಾಲಾಗಿದ್ದ. ಮಾತುಕತೆಯೆಲ್ಲ ಮುಗಿದ ಮೇಲೆ ಎಲ್ಲರೂ ನನ್ನ ಲ್ಯಾಬನ್ನ ಗಮನಿಸಿ ಹೊರಡುತ್ತಿದ್ದಂತೆ, ಆ ಅಧಿಕಾರಿ ವಾಪಸ್ಸು ದೌಡಾಯಿಸಿ ಬಂದು ಇಲ್ಲಿ ಟಾಯ್ಲೆಟ್ ಎಲ್ಲಿದೆ..? ಅಂತ ಸಂಕೋಚದಿಂದಲೇ ಕೇಳಿದ. ಅವನ ಅದುವರೆಗಿನ ಚಡಪಡಿಕೆಗೆ ಕಾರಣ ಗೊತ್ತಾಯ್ತು! ಯಾಕೋ ಇಂಡಿಯನ್ ಫುಡ್ಡು ಹಿಡಿಸುತ್ತಿಲ್ಲ ನೋಡು.. ಎನ್ನುತ್ತಾ ನಾನು ಕೈತೋರಿದೆಡೆಗೆ ಬಿರಬಿರ ಹೆಜ್ಜೆಹಾಕತೊಡಗಿದ…

ಸಧ್ಯ! ಎಲ್ಲಾ ಸುಸೂತ್ರವಾಗಿ ಮುಗೀತಲ್ಲಾ ಎಂದುಕೊಳ್ಳುತ್ತಾ ನಾನು ಅಲ್ಲೇ ಬಚ್ಚಿಟ್ಟಿದ್ದ ‘ಅಪಾರ’ನ ‘ಮದ್ಯಸಾರ’ಕ್ಕೆ ಕೈಯಿಟ್ಟೆ! ಉಳಿವರು ಅವನಿಗಾಗಿ ಕಾಯುತ್ತಾ ಹೊರಗಿನ ಸೋಫಾದಲ್ಲಿ ಪವಡಿಸಿದ್ದರು.
ಸ್ವಲ್ಪ ಹೊತ್ತಿನಲ್ಲೇ ಅವರೊಡನಿದ್ದ ಬಿಳೀ ಟೀಶರ್ಟು-ಜೀನ್ಸ್ ಪ್ಯಾಂಟಿನಾಕೆ ಲ್ಯಾಬೊಳಗೆ ಬಂದಳು. ನಾನು ಕೈಲಿದ್ದ ಪುಸ್ತಕವನ್ನು ತದಬಡಿಸಿ ಮುಚ್ಚಿಟ್ಟು ಕಷ್ಟಪಟ್ಟು ಕಿರುನಗೆ ಬೀರಿದೆ. ಆ ಪೋಸ್ಟರ್ಗಳು ನಂಗಿಷ್ಟವಾದವು, ಎಲ್ಲಿಂದ ಕೊಂಡು ತಂದೆ? ಎಂದಳು. ಯಾವ ಪೋಸ್ಟರ್ ಎಂದು ನನಗರ್ಥವಾಗಲಿಲ್ಲ. ಅವಳೇ ತೋರಿಸಿದಳು. ನಾನು ಲ್ಯಾಬಿನ ಅಲ್ಲಲ್ಲಿ ‘ಡು ನಾಟ್ ಟಚ್’, ‘ಬಯೋ ಹಜಾರ್ಡ್’, ‘ಇನ್ಸ್ಟ್ರಕ್ಷನ್ಸ್’ ಅಂತೆಲ್ಲಾ ಬರೆಯಬೇಕಿದ್ದಲ್ಲಿ ಒಂದೊಂದು ಕಾರ್ಟೂನು ಬಿಡಿಸಿ-ಬಣ್ಣ ಹಚ್ಚಿ, ಅದರ ಮೂಲಕ ಹಾಗೆಲ್ಲಾ ಹೇಳಿಸಿ ಅಂಟಿಸಿದ್ದೆ. ಅದನ್ನೇ ಅವಳು ಪೋಸ್ಟರ್ ಅಂದಿದ್ದು..

ಥ್ಯಾಂಕ್ಸ್! ಅದು ಕೊಂಡಿದ್ದಲ್ಲ; ನಾನೇ ಸ್ವತಃ ಬಿಡಿಸಿದ್ದು ಅಂದೆ. ಹೌದಾ..?! ಎನ್ನುತ್ತಾ ಕಣ್ಣನ್ನು ಇಷ್ಟಗಲ ಮಾಡಿಕೊಂಡು ಚಿತ್ರಗಳನ್ನೇ ತದೇಕಚಿತ್ತದಿಂದ ನೋಡುತ್ತಾ ಕ್ಯಾನ್ ಐ ಗೆಟ್ ವನ್, ಐ ರಿಯಲ್ಲೀ ಲೈಕ್ ದೆಮ್… ಎಂದಳು. ಇದನ್ನೇ ತಗೊಳ್ಳಿ ಎನ್ನುತ್ತಾ ಅಲ್ಲಿದ್ದುದನ್ನು ಅವಳ ಕೈಗಿಟ್ಟೆ. ಇದಕ್ಕೆ ಎಷ್ಟು ತಗೋತೀರಾ? ಎಂದುಲಿದು ಪರ್ಸಿಗೆ ಕೈ ಹಾಕಿದಳು! ನಮ್ಮ ದೇಶದ ಕಾರ್ಟೂನಿಷ್ಟರಿಗೆ ಒಂದೋ ಎರೆಡೋ ಯೂರೋ ಸಿಕ್ಕುವುದೇ ಕಷ್ಟ.. ಎಂದು ಹೇಳಬೇಕೆಂದಿದ್ದವನು ನಾಲಿಗೆ ತಡೆದು ಇರಲಿ ಬಿಡಿ, ನಿಮ್ಮ-ನನ್ನ ಭೇಟಿಯ ನೆನಪಿಗೆ ಇದೊಂದು ಕಾಣಿಕೆ ಎಂದಿಟ್ಟುಕೊಳ್ಳಿ.. ಎಂದುಬಿಟ್ಟೆ!! ಹೌದಾ..?! ಅಂತ ಮತ್ತೊಮ್ಮೆ ಕಣ್ಣರಳಿಸಿ, ಕೈನೀಡಿ ನನ್ನ ಕೈಯನ್ನೂ ಅವಳ ಧಡೂತಿ ದೇಹವನ್ನೂ ಒಟ್ಟೊಟ್ಟಿಗೆ ಕುಲುಕುಲು ಕುಲುಕಿ ಥ್ಯಾಂಕ್ಯೂ ವೆರಿಮಚ್ ಎನ್ನುತ್ತಾ ಅವಳ ಪರಿಚಯದ ಕಾರ್ಡನ್ನು ನನ್ನ ಕೈಗಿತ್ತು ಹೊರಹೊರಟಳು.
ಅದೇ ಸಮಯದಲ್ಲಿ ಅತ್ತ ಕಡೆಯಿಂದ ಬಂದ ಅಧಿಕಾರಿಯೂ ಥ್ಯಾಂಕ್ಸ್ ಎ ಲಾಟ್ ಎಂದು ಪೆಚ್ಚು ನಗೆ ಬೀರುತ್ತಾ ಹೇಳಿ ಅವರನ್ನು ಕೂಡಿಕೊಂಡ.

ಈ ಎರೆಡು ‘ಥಾಂಕ್ಯೂ’ಗಳಿಂದಾಗಿ ನನ್ನ ಕಾರ್ಟೂನೊಂದು ಯೂರೋಪಿನ ಹಾದಿ ಹಿಡಿದಿದ್ದನ್ನು ನೆನೆದು ಹಿಗ್ಗುತ್ತಾ, ಕರೆಂಟು ಹೊಡೆಸಿಕೊಂಡ ಡಿಎನ್ಯೆ ಕಥೆ ಏನಾಗಿದೆಯೆಂದು ನೋಡಲು ಅತ್ತ ಹೆಜ್ಜೆ ಹಾಕಿದೆ…

ಈ ಬರಹವನ್ನು ಅವಧಿಯಲ್ಲಿ ಓದಲು ಇಲ್ಲಿ ಕ್ಲಿಕ್ಕಿಸಿ...

ಗುರುವಾರ, ಏಪ್ರಿಲ್ 5, 2012

ನಿರವಯವ ಹಾಗೂ ನಾಗರಾಜ ವಸ್ತಾರೆ...




ನಾಳೆ ವಸುಧೇಂದ್ರರ ಛಂದ ಪುಸ್ತಕಗಳ ಬಿಡುಗಡೆ ಸಮಾರಂಭವಿದೆ. ಅಲ್ಲಿ ನಮ್ಮೂರ ಕಥೆಗಾರ ನಾಗರಾಜ ವಸ್ತಾರೆಯವರ ಸಂಕಲನ 'ನಿರವಯವ' ಅನಾವರಣಗೊಳ್ಳಲಿದೆ....
ಇಷ್ಟಕ್ಕೂ ನಿರವಯವ ಎಂದರೇನು ಎಂಬ ಕುತೂಹಲಕಾರಿ ಚರ್ಚೆ ಫೇಸ್ಬುಕ್ಕಿನಲ್ಲಿ ನಡೆಯುತ್ತಿತ್ತು. ಅದಕ್ಕೆ ವಸ್ತಾರೆಯವರು ಉತ್ತರಿಸಿದ್ದು ಹೀಗೆ....


ನಿರವಯವ- ಅಂದರೆ ಸರಳವಾಗಿ ಅವಯವಯವಿಲ್ಲದ್ದು ಅಂತ ಅರ್ಥೈಸಬಹುದೇನೋ. 

ವಸುವಿನ ಪ್ರಕಾರ, ಅವನೊಮ್ಮೆ ಹೇಳಿದ ಹಾಗೆ- ಅದು ಅನಂಗ, ಅರ್ಥಾತ್ ಕಾಮ! ಸ್ಸಾರಿ... ನಾನು ಹಾಗೆ ಯೋಚಿಸಿಯೇ ಇರಲಿಲ್ಲ. 

ಇಂಗ್ಲಿಶ್ನಲ್ಲಿ ಆರ್ಗ್ಯಾನಿಕ್ (organ-ic) ಅನ್ನೋ ಬಳಕೆ ಇದೆ ನೋಡಿ- ಅದನ್ನ ಕನ್ನಡದ ಭೂಪರು ಸಾವಯವ (-ಅವಯವ) ಅಂತ ಬಳಸುತ್ತಾರೆ. ಆರ್ಗ್ಯಾನಿಕ್ಅನ್ನುವುದನ್ನು ಎಲ್ಲ ಸೃಜನಶೀಲ ಕ್ಷೇತ್ರದ ಮಂದಿಯೂ ಬಳಸುತ್ತಾರೆ ಅನಿಸುತ್ತೆ. (ಎಸ್. ಆರ್. ವಿಜಯಶಂಕರರು ಆಗಾಗ- ಅಂದರೆ ಎಲ್ಲರ ಕೃತಿಗಳ ಮೇಲೂಸಾವಯವಶಿಲ್ಪದ ಸಮಗ್ರೀಕರಣಅಂತೇನನ್ನೋ ಹೇಳುತ್ತಾರೆ!!) ನನಗೆ ತಿಳಿದ ಮಟ್ಟಿಗೆ ಆರ್ಗ್ಯಾನಿಕ್ ಅಂದರೆ ತಂತಾನೇ ಆಗಿರ್ಓದು ಅಂತ ಅರ್ಥ. ಅಂದರೆ ಯಾವುದೇ ಬುದ್ಧಿ (ಬೌದ್ಧಿಕವಾದ) ಸರ್ಕಸುಗಳಿಲ್ಲದೆ ತನ್ನಷ್ಟಕ್ಕೆ ಆಗಿರ್ಓದು. ನಮ್ಮ ಹಳೆಯ ಊರುಗಳು ಆಗಿರುವುದು ಹೀಗೆ. ಹೊಸ ಊರುಗಳಲ್ಲಿ ಆಗುವ ಹಾಗೆ ದೊಡ್ಡ ದೊಡ್ಡ ಡಿಗರಿಗಳಿರುವ ಇಂಜಿನಿಯರು, ಆರ್ಕಿಟೆಕ್ಟುಗಳು ಪ್ರಜ್ಞಾಪೂರ್ವಕವಾಗಿ ಇಂತಹ ಊರುಗಳನ್ನು ಕಟ್ಟಿರುವುದಿಲ್ಲ. ಹಾಗಾಗಿಯೇ ಊರುಗಳು ಸಾವಯವವಿರುತ್ತವೆ. ಅಂದರೆ ಅವುಗಳಲ್ಲೇನೋ ಜೀವಂತಿಕೆಯಿದೆ. ಸಾವಯವವೆನ್ನುವುದಕ್ಕೆ ವ್ಯತಿರಿಕ್ತವಾಗಿ ನಿರವಯವ ಅಂತನ್ನುವ ಪ್ರಯೋಗವಿದೆ. ಅಂದರೆ- ಇನಾರ್ಗ್ಯಾನಿಕ್ (in-organ-ic). ಇದನ್ನು ಜೀವಂತಿಕೆಯಿಲ್ಲದ್ದು ಅನ್ನಬಹುದೆ? ಹಾಗೆ ನೋಡಿದರೆ ನಮ್ಮ ದೊಡ್ಡ ದೊಡ್ಡ ಊರುಗಳೆಲ್ಲ ಇಂಥವು. ಬರೇ ಯಾಂತ್ರಿಕ. ಬುದ್ಧಿಯ ಕಸರತ್ತು ಮಾಡುವ ಮಂದಿ ಬರೆದಿಟ್ಟ ಪ್ರೋಗ್ರಾಮಿಗೆ ತಕ್ಕುದಾಗಿ ಜರುಗುವಂಥವು!

ಇನ್ನು ಕನ್ನಡದಲ್ಲಿ ಓದಲಾಗುವ ಖೆಮಿಸ್ಟ್ರಿಯಲ್ಲಿ- ಸಾವಯವ ರಸಾಯನ (organic chemistry), ನಿರವಯ ರಸಾಯನ (inorganic chemistry) ಅಂತನ್ನುವ ಪ್ರಯೋಗಗಳಿವೆ. ಇಲ್ಲಿ ಸಾವಯವ ಅಂತನ್ನುವುದು ಜೀವಿಗಳಿಗೆ ಸಂಬಂಧಿಸಿದ ಅಥವಾಜೀವವನ್ನು ಕಟ್ಟುವ ರಸಾಯನಗಳನ್ನು ಕುರಿತು ರೆಫರಿಸುತ್ತದೆ. ಗ್ಲುಕೋಸ್, ಸುಕ್ರೋಸ್... ಇತ್ಯಾದಿ ಸಕ್ಕರೆಗಳು, ಪ್ರೋಟೀನು-ಅಮಿನೋಆಮ್ಲಗಳು... ಇತ್ಯಾದಿಗಳುಸಾವವಯವವೆಂದು ನೆನಪಿಗೆ ಬರುತ್ತವೆ. ಹಾಗೆಯೇ ಖೆಮಿಸ್ಟ್ರಿಯಲ್ಲಿ ನಿರವಯವ- ಅಜೀವ/ನಿರ್ಜೀವ ವಸ್ತುಕಣಗಳಿಗೆ ಸಂಬಂಧಿಸಿದ್ದು. 

ವಿವರಣೆ ಹೆಚ್ಚಾಯಿತೇನೋ... ಇರಲಿ. 

ಇನ್ನು ನನ್ನನಿರವಯವಕ್ಕೆ ಸಂಬಂಧಿಸಿದ ಹಾಗೆ- ಒಂದೆರಡು ಮಾತು. ಅವಯವಗಳಿರುವ ನಾವೆಲ್ಲರೂ ಸಾವಯವರು. ನಮ್ಮೊಳಗೆ ಅವಯವವಿಲ್ಲದಇನ್ನೊಂದುಇದೆಯಲ್ಲ- ಒಳಗಿದ್ದು ನನ್ನನ್ನುನಾನುಅಂತ ಗಣಿಸುವುಂಥದು... ಅದು ನನ್ನ ಮಟ್ಟಿಗಿನ ನಿರವಯವ!
ದಯಮಾಡಿ ನನ್ನನಿರವಯವವನ್ನು ಕೊಂಡು ಓದಿ. ‘ಛಂದವನ್ನು ಉದ್ಧರಿಸಿ.  



ಬುಧವಾರ, ಮಾರ್ಚ್ 28, 2012

ಕುಲಾಂತರಿ ಚರ್ಚೆ ಬಗ್ಗೆ ಒಂದಿಷ್ಟು

ಕುಲಾಂತರಿಗಳ ಬಗ್ಗೆ  "ಕನ್ನಡಪ್ರಭ"  ಪತ್ರಿಕೆಯಲ್ಲಿ ಶಾಂತು ಶಾಂತಾರಾಮ್ ಹಾಗೂ ಎಮ್ ಮಹದೇವಪ್ಪ ಅವರು ಬರೆದ ಬರಹ ಓದುಗರನ್ನು ದಾರಿತಪ್ಪಿಸುವಂತಿದೆಯೇ ವಿನಹಾ ಅವುಗಳ ಕುರಿತು ಸರಿಯಾದ ಮಾಹಿತಿಯನ್ನು ನೀಡುವಲ್ಲಿ ವಿಫಲವಾಗಿದೆ. ಕುಲಾಂತರಿಗಳನ್ನು ಅಭಿವೃದ್ದಿಯ ಹೆಸರಲ್ಲಿ, ಅಧಿಕ ಅಹಾರ ಉತ್ಪಾದನೆಯ ನೆಪದಲ್ಲಿ ರೈತರ ಹಾಗೂ ಗ್ರಾಹಕರ ಮೇಲೆ ಹೇರುವ ಪ್ರಯತ್ನದ ಒಂದು ಭಾಗವಾಗಿ ಈ ಬರಹಗಳು ಮೂಡಿಬಂದಿವೆಯಷ್ಟೇ.

 ವಿಜ್ಞಾನವು ಸತ್ಯ ಶೋಧನೆಯಿಂದ ರೂಪಗೊಳ್ಳುವುದೇ ವಿನಹ ಸಂಖ್ಯಾ ಬಲದಿಂದಲ್ಲ ಎಂಬ ಮಹದೇವಪ್ಪನವರ ಮಾತುಗಳು ಒಪ್ಪತಕ್ಕದ್ದೇ . ಆದರೆ ಬಿ.ಟಿ. ಬದನೆ ಕುರಿತ ಚರ್ಚೆ ಯಲ್ಲಿ ವಿಜ್ಞಾನಿಗಳಿಗೆ ಸೂಕ್ತ ಕಾಲಾವಕಾಶ ಸಿಗಲಿಲ್ಲ ಎಂಬ ಮಾತು ಸತ್ಯಕ್ಕೆ ದೂರ. ತಾತ್ಕಾಲಿಕ ನಿಷೇಧ ಹೇರುವ ಮುನ್ನ ದೇಶದ ಹಲವೆಡೆಗಳಲ್ಲಿ ಪರ-ವಿರೋಧಗಳ ಬಗ್ಗೆ ಪರಿಸರ ಸಚಿವಾಲಯ ವಿಸ್ತೃತ ಚರ್ಚೆ ನಡೆಸಿತ್ತು. ಇಷ್ಟಲ್ಲದೇ  ದೇಶದ ಪ್ರತಿಷ್ಟಿತ ಆರು ವಿಜ್ಞಾನ ಅಕಾಡೆಮಿಗಳಿಂದ ಅಭಿಪ್ರಾಯ ಕೇಳಿತ್ತು. ಆದರೆ ಅಲ್ಲಿನ ವಿಜ್ಞಾನಿಗಳು ಕೊಟ್ಟ ಬೇಜಾವಾಬ್ದಾರಿಯುತ ವರದಿ ಎಲ್ಲರಿಂದ ಟೀಕೆಗೆ ಒಳಗಾಗಿದ್ದು ನೆನಪಿರಬಹುದು. ಎಲ್ಲದಕ್ಕೂ ವೈಜ್ಞಾನಿಕ ಆಧಾರ ಕೇಳುವವರು ತಮ್ಮ ವರದಿಯ ಬಗ್ಗೆ ಏಕೆ ಚಕಾರ ಎತ್ತುವುದಿಲ್ಲ? ಅಲ್ಲೇಕೆ ಯಾವುದೇ ವೈಜ್ಞಾನಿಕ ಆಧಾರ ನೀಡದೇ ತೀರ ಕಳಪೆ ಗುಣಮಟ್ಟದ ವರದಿ ಕೊಟ್ಟರು?

ಬಿ.ಟಿ. ಹತ್ತಿ ಬಂದ ಮೇಲೆ ಹತ್ತಿಯನ್ನು ಆಮದು ಮಾಡಿಕೊಳ್ಳುತ್ತಿದ್ದ ಭಾರತ ಹತ್ತಿ ರಫ್ತು ಮಾಡುವ ದೇಶವಾಯ್ತೆಂದು ಹೆಮ್ಮೆಯಿಂದ ಹೇಳುವವರು ಇತ್ತೀಚೆಗೆ ಹತ್ತಿಯ ಒಟ್ಟಾರೆ ಉತ್ಪಾದನೆ ಕಡಿಮೆಯಾಗಿದೆಯೆಂದು ಕೇಂದ್ರ ರಫ್ತು ನಿಷೇಧ ಮಾಡಲು ಹೊರಟಿದ್ದನ್ನೇಕೆ ಪ್ರಜ್ನಾಪೂರ್ವಕವಾಗಿ ಮರೆಮಾಚುತ್ತಾರೆ? ದೇಶದ ಶೇಕಡಾ 93ರಷ್ಟು ಭಾಗದಲ್ಲಿ ಬಿ.ಟಿ.ಹತ್ತಿಯನ್ನೇ ಬೆಳೆಯುತ್ತಿದ್ದರೂ ಹೀಗಾಗಿದ್ದೇಕೆ?!

ಸದ್ಯ ನಮ್ಮ ಮಾರುಕಟ್ಟೆಯಲ್ಲಿರುವ ಎಲ್ಲ ಕುಲಾಂತರಿ ತಳಿಗಳು ಖಾಸಗೀ ಕಂಪನಿಗಳಿಂದಲೇ ಬಂದವು. ಸರ್ಕಾರಿ ಸ್ವಾಮ್ಯದ ಸಂಸ್ತೆಗಳು ಇನ್ನೂ ಅಂಬೆಗಾಲಿಕ್ಕುತ್ತಿವೆಯಷ್ಟೆ. ಮೊನ್ಸಾಂಟೋ ಕಂಪನಿಯ ಬಿ.ಟಿ. ಜೀನನ್ನು ತೋರಿಸಿ ತಾವು ತಯಾರಿಸಿದ್ದೆಂದು ಹೇಳಿ ಸಿಕ್ಕಿಹಾಕಿಕೊಂಡ ಧಾರವಾಡ ಹಾಗೂ ದೆಹಲಿಯ ಕೃಷಿ ವಿಜ್ಞಾನಿಗಳ ಪ್ರಕರಣವನ್ನು ಇಲ್ಲಿ ನೆನಪಿಸಿಕೊಂಡರೆ ತಪ್ಪಾಗಲಾರದು. ಹೀಗೇ ಆದರೆ ಇನ್ನೊಂದು ದಶಕ ಕಳೆದರೂ ಸರ್ಕಾರಿ ರಂಗದಿಂದ ಬಿ.ಟಿ. ಅಭಿವೃದ್ದಿ ಅನುಮಾನ. ಅಷ್ತರಲ್ಲಿ ಖಾಸಗೀ ಕಂಪನಿಗಳು ರೈತರನ್ನು ತಮ್ಮ ಕಪಿಮುಷ್ಟಿಯೊಳಗೆ ಹಿಡಿದಿರುವುದರಲ್ಲಿ ಅನುಮಾನವಿಲ್ಲ. ಇನ್ನು ರೈತರೇ ಇದರ ಬೀಜೋತ್ಪಾದನೆ ಮಾಡಿಕೊಳ್ಳಬಹುದೆಂಬ ಹಸಿ ಸುಳ್ಳನ್ನೇಕೆ ಹೇಳುತ್ತಾರೆಂಬುದು ಅರ್ಥವಾಗದು.

ವೈಜ್ಞಾನಿಕ ಸಂಶೋಧನೆ ನಡೆಸಿ ಸುರಕ್ಷಿತ ಎಂದು ಸಾಬೀತಾದವುಗಳನ್ನು ಬಳಸಬಹುದೆನ್ನುತ್ತಲೇ ಸುರಕ್ಷತೆಗಾಗಿ ಯಾವ್ಯಾವ ಪರೀಕ್ಷೆ ಮಾಡಾಬೇಕೆಂದು ಸೂಚಿಸಿದ ಪುಷ್ಪ ಭಾರ್ಗವರ ಮೆಲೆ ಹರಿಹಾಯುವುದು ಪೂರ್ವಾಗ್ರಹವಲ್ಲದೇ ಮತ್ತೇನು?
ಹಸಿರು ಕ್ರಾಂತಿಯ ಗಡಿಬಿಡಿಯಲ್ಲಿ ನಾವು ಮಾಡಿದ ಅದ್ವಾನಗಳು ಈಗಷ್ಟೇ ಅರಿವಿಗೆ ಬರುತ್ತಿರುವಾಗ ಮತ್ತೊಂದು ಹಸಿರು ಕ್ರಾಂತಿ ಮಾಡುವ ಮುನ್ನ ಅದರಿಂದಾಗಬಹುದಾದ ಹಾನಿಕಾರಕ ಪರಿಣಾಮಗಳ ಬಗ್ಗೆ ಈಗಲೇ ಯೋಚಿಸಿ, ಸೂಕ್ತ ಸಂಶೋಧನೆ ನಡೆಸಿ ನಿವಾರಿಸಿಕೊಳ್ಳಬೇಕಿದೆ. ಕುಲಾಂತರಿಗಳ ಬಗ್ಗೆ ಇನ್ನೂ ವಿರೋಧಾಭಾಸ ಅಭಿಪ್ರಾಯಗಳು ವಿಜ್ಞಾನಿಗಳಲ್ಲೆ ಇರುವಾಗ ಅವನ್ನು ಮಾರುಕಟ್ಟೆಗೆ ಬಿಡಬೇಕೆನ್ನುವುದರ ಹಿಂದೆ ಕಾರ್ಪೋರೇಟ್ ಲಾಬಿಯಿದೆಯೇ ಹೊರತು ಮತ್ತೇನಲ್ಲ.

ಕುಲಾಂತರಿ ಬೀಜಗಳನ್ನು ಮೊದಮೊದಲಿಗೆ ಕಡಿಮೆ ಬೆಲೆಗೆ ಮಾರಿ ಒಮ್ಮೆಗೆ ನಾಲ್ಕು ಪಟ್ಟು ಬೆಲೆ ಏರಿಸಿದರೆ ರೈತರ ಸ್ತಿತಿ ಏನಾಗಬೇಡ? ತನ್ನಲ್ಲಿದ್ದ ದೇಶಿ ತಳಿಗಳ ಬೀಜವನ್ನು ಕಳೆದುಕೊಂಡು ಬೇರೆ ದಾರಿಯಿಲ್ಲದೇ ಕಂಪನಿಗಳ ಬಾಗಿಲು ಬಡಿಯುವ ರೈತನ ಸ್ತಿತಿಯನ್ನು ಆಧುನಿಕ ವಸಾಹತುಶಾಹಿಯ ಪರಿಣಾಮ ಅನ್ನದೇ ವಿಧಿಯಿಲ್ಲ. ಡಾಲರ್ ಲೆಕ್ಕದಲ್ಲಿ ಸಂಬಳ ಎಣಿಸುವವರಿಗೆ ನಮ್ಮ ಸಣ್ಣ ಹಿಡುವಳಿದಾರರಿಗೆ 1000 ರೂಪಾಯಿಯೂ ದೊಡ್ದ ವೊತ್ತ ಎಂಬುದು ಅರ್ಥವಾಗುವುದಿಲ್ಲ.

ಎಲ್ಲದಕ್ಕೂ ವೈಜ್ಞಾನಿಕ ಆಧಾರ ಕೇಳುವವರು ಬಿ.ಟಿ.ಯ ಹಾನಿಕಾರಕ ಅಂಶಗಳ ಬಗ್ಗೆ ಬೆಳಕು ಚೆಲ್ಲುವ ಸಂಶೋಧನಾ ಪ್ರಭಂಧಗಳನ್ನೇಕೆ ಮರೆಮಾಚುತ್ತಾರೆಂದು ಅರ್ಥವಾಗದು. ಮೊನಾರ್ಕ್ ಚಿಟ್ಟೆ, ಲೇಸ್ವಿಂಗ್ ಮೊದಲಾದ ನಿರಪಾಯಕಾರಿ ಕೀಟಗಳಿಗೆ ಬಿ.ಟಿ. ವಿಶಕಾರಿ ಎಂಬ ಬಗ್ಗೆ ಸಾಕಷ್ಟು  ವೈಜ್ನಾನಿಕ ಮಾಹಿತಿ ಇದೆಯಲ್ಲಾ?!

ಇನ್ನು ಶಾಂತು ಶಾಂತಾರಾಮರ ರೈತಪರ ಕಳಕಳಿ ಎಷ್ತಿದೆ ಅನ್ನೊದು ಗೊತ್ತಾಗಬೇಕಾದರೆ ಅವರೇ ಕೇರಳದಲ್ಲಿ ನಡೆದ ಸಮಾರಂಭವೊಂದರಲ್ಲಿ ನೀಡಿದ ಹೇಳಿಕೆಯನ್ನು ಗಮನಿಸಬೇಕು “if any of us are the seed companies or in the seed business, would we like ourcustomers to approach us only once? Why wouldn't we like our business to multiply? Wouldn't it be economically viable for us to ensure that farmers buy seed from us every year? “  ಇದು ಅವರು ಮಾಡುತ್ತಿರುವ ಕಾರ್ಪೋರೆಟ್  ಲಾಬಿಯಲ್ಲದೇ ಮತ್ತೇನು?

ಇಷ್ಟಕ್ಕೂ ಶಾಂತಾರಾಮರು ಕೃಷಿ ಜೈವಿಕ ತಂತ್ರಜ್ಞಾನದ ದೈತ್ಯ ಕಂಪನಿ 'ಸಿಂಜೆಂಟಾ'ದ ಉದ್ಯೋಗಿಯಾಗಿದ್ದವರು. ಕುಲಾಂತರಿಗಳನ್ನೆ ಉಸಿರಾಡುತ್ತಿರುವ ಹನ್ನೆರೆಡು ಜಾಗತಿಕ ಕಂಪನಿಗಳ ಮುಖವಾಣಿಯಾದ ABLE-AG(Association of Biotech LeadEnterprices-Agriculture Group)ನ ಮುಖ್ಯಸ್ತರಾಗಿರುವವರು. 'ಬಯಾಲಜಿಕ್ಸ್ ಇಂಟೆನ್ರ್ಯಾಶನಲ್' ಎಂಬ ತಮ್ಮದೇ ಆದ ಸಂಸ್ತೆಯೊಂದನ್ನು ಕಟ್ಟಿಕೊಂಡು ಜೈವಿಕ ತಂತ್ರಜ್ಞಾನ ಕಂಪನಿಗಳಿಗೆ ಸಲಹೆ ಕೊಡುತ್ತಿರುವವರು. ಅವರಿಗೆ ರೈತಪರ ಕಳಕಳಿಗಿಂತ ಕಾರ್ಪೋರೇಟ್ ಕಳಕಳಿಯೇ ಹೆಚ್ಚಾಗಿ ಇದ್ದಂತಿದೆ!

ಭಾರತೀಯ ಕೃಷಿಕ ಹಾಡುತ್ತ ಕುಣಿಯುತ್ತ ಸ್ತಳೀಯವಾಗಿ ಲಭ್ಯವಿದ್ದುದನ್ನೇ ಬಳಸಿಕೊಂಡು ಖುಶಿಯಿಂದ ಕೃಷಿ ಮಾಡಿದ್ದುಕೊಂಡವ. ಅಭಿವೃದ್ದಿಯ ಹೆಸರಲ್ಲಿ ಆತನಿಗೆ ದೇಶಕ್ಕೆಲ್ಲ ಅನ್ನವುಣಿಸುವ ಜವಾಬ್ದಾರಿ ಕೊಟ್ಟು, ಭೂಮಿ ಕಿತ್ತುಕೊಳ್ಳುತ್ತಾ ಈಗಾಗಲೆ ಸಾಕಷ್ಟು ಸಂಕಷ್ಟಗಳಿಗೆ ಈಡು ಮಾಡಿದ್ದೇವೆ. ಹೀಗೇ ಆದರೆ ಇನ್ನವನನ್ನು ಬಹುರಾಷ್ಟ್ರೀಯ ಕಂಪನಿಗಳ ಜೀತಕ್ಕಿಡುವ ದಿನಗಳೂ ದೂರವಿಲ್ಲ ಎನಿಸುತ್ತಿದೆ.. ..

ಗುರುವಾರ, ಮಾರ್ಚ್ 1, 2012

ಒಂದು ಬೆಳ್ಳಿ ಕೂದಲು


ಮೊನ್ನೆ ಒಂದು ಭಾನುವಾರದಂದು
ಲೇಟಾಗೆದ್ದು, ಹಲ್ಲುಜ್ಜಿ ಕಾಫಿ ಹೀರಿ
ಹಾಡುಹೇಳುತ್ತಾ ಸ್ನಾನ ಮಾಡಿ
ಕನ್ನಡಿ ಮುಂದೆ ತಲೆ ಒರೆಸಿಕೊಳ್ಳುತ್ತಾ
ನಿಂತವನಿಗೆ ತಲೆಯಲ್ಲೇನೋ
ಫಳ್ ಎಂದು ಹೊಳೆದಂತಾಯ್ತು...

ನನ್ನಂಥ ಟ್ಯೂಬ್‍ಲೈಟು ಕವಿಗೆ
ಆಗೀಗ ಹಾಗೆ ಝಗ್ಗನೆ ಸ್ಪೂರ್ತಿ
ಉಕ್ಕುವುದು ಹೊಸತಲ್ಲ ಬಿಡಿ...

ಆದರೆ ಈ ಬಾರಿ ಹಾಗಲ್ಲ,
ಹೀಗೆ ಹೊಳೆದಿದ್ದು ತಲೆಯೊಳಗಲ್ಲ,
ಅದೊಂದು ಬೆಳ್ಳಿ ಕೂದಲು!

ಅರೆ! ಅರವತ್ತಾದ ಮೇಲೆ
ಬಣ್ಣ ಬದಲಿಸಬೆಕಾದ್ದು
ಈಗಲೇ ಫಳಫಳಿಸಿದರೆ ಹೇಗೆ?!
ಅದೂ ನನ್ನಂಥ ಮೊನ್ನೆ ಮೊನ್ನೆ
ಟೀನೇಜು ಜಾರಿಸಿದವನಿಗೆ...?
ತಲೆ ಕೆರೆದು ಯೋಚಿಸಿದೆ,
ಒಂದಿಷ್ಟು ಕೂದಲುದುರಿತೇ ವಿನಃ
ಉತ್ತರ ಸಿಗಲಿಲ್ಲ...


ತಲೆಬಿಸಿಯಾಯ್ತು...
ನನಗಿನ್ನೂ ಇಪ್ಪತ್ತೈದಾಗಿಲ್ಲ,
ಮದುವೆ ಆಗಿಲ್ಲ; ಹೋಗಲಿ,
ಹುಡುಗಿಯನ್ನೂ ಹುಡುಕಿಕೊಂಡಿಲ್ಲ!
ಈಗಷ್ಟೇ ಅಆಇಈ ಮುಗಿಸಿ
ಕಾಲೇಜು ಮೆಟ್ಟಿಲೇರಿದವನಿಗೆ
ಕೂದಲು ಬೆಳ್ಳಗಾಗಲು ಕಾರಣವೇ ಇಲ್ಲ...

ಇರಬಹುದೇ ಇದು
ತಲೆತುಂಬಾ ತುಂಬಿಕೊಂಡ
ಟೆನ್ಶನ್ನುಗಳ ಫಲ?
ಮಾಲಿನ್ಯ? ವಿಷವುಳ್ಳ ಆಹಾರ?
ಅಥವಾ ನನ್ನ ಚಂದದ ಕೂದಲ ಮೇಲೆ
ಯಾರದೋ ಹೊಟ್ಟೆಕಿಚ್ಚು?!

ತಲೆ ಕೊಡವಿದೆ;
ಹೋಗಲಿ ಬಿಡಿ, ಯಾಕಿಷ್ಟು ಚಿಂತೆ?
ಇಷ್ಟಕ್ಕೂ ಒಂದೇ ಒಂದು ಕೂದಲು ತಾನೇ..?
ಬಿಳಿಕೂದಲು ಬುದ್ದಿಜೀವಿಗಳ ಲಕ್ಷಣ!
ಆದರೂ...
ಸದ್ಯಕ್ಕೆ ಹೇರ್‌ಡೈ ಹಚ್ಚೋಣ..!!